--------------------------------
ഇന്നും കാത്തിവള് പൂനിലാവുപുളകം
പെയ്യുന്ന രാവില്ക്കുളി-
ച്ചെന്നോടക്കുഴലൂതവേ ചുഴികളായ്
ചുറ്റിത്തിരിഞ്ഞങ്ങനെ
വര്ണ്ണച്ചിന്തുകള് ചിത്രഭംഗി പകരും
നിന് മേഘകാന്തിക്കറു-
പ്പെന്നും കണ്ണില് നിറച്ചിടാന്! പ്രിയതമേ,
യെന്തേ മറന്നെന്നെ നീ?
കാര്മേഘാവൃതമെങ്കിലും തിരളുമാ
ജീവത്പ്രകാശം സദാ
വ്യാമോഹങ്ങള് നിറച്ചിതെന്റെ മതിയോ-
ടെന്തോ പുലമ്പുന്നിതാ
ഹേ, മോഹിപ്പതു ഭംഗിയല്ല നിതരാം
നിന്മേഘ തീരങ്ങളില്
സാമോദം സകലാഭ പെയ്തു തിരനോ-
ട്ടം നീ നടത്തീടുക!
ഹാ ഹാ! കാര്മുകിലേറിടുന്നു കളിയല്ലാ-
കാശാമാകേയിരു-
ണ്ടാക്രോശിച്ചു തൊടുത്തിടുന്ന സുദൃഢം
മൌനക്കൊടുങ്കോട്ടകള്
പെയ്യും നിന് ചുടു വീര്പ്പുകള് തടമുറി-
ഞ്ഞേതും തുടര്ന്നീടുവാന്
പയ്യാരങ്ങളടക്കിഞാന് പ്രിയതരം
സ്വപ്നങ്ങളില് മേവിടാം.
****
അകലെ മേഘങ്ങള് തുടിയൊരുക്കുന്നതോ
തുകിലുകൊട്ടിപ്പതമ്പാട്ടിടുന്നതോ
പകപെരുത്തിടനെഞ്ഞിലേക്കാഞ്ഞാഞ്ഞു
മുകിലിതായടിച്ചാര്ത്തലക്കുന്നുവോ?
പ്രളയകാലം പുനര്ജ്ജനിക്കുന്നതോ,
വ്രണിതക്ഷിത്തിന്നടങ്ങാത്ത രോഷമോ,
ഉറവ വറ്റിത്തടഞ്ഞ നീര്ച്ചാലുകള്-
ക്കുണരുവാനുര്വ്വിയാര്ത്തിരമ്പുന്നതോ?
കരനിറക്കുമക്കന്മഷക്കാഴ്ച്ചകള്
കഴുകുവാന് പെയ്തു പെയ്തിറക്കുന്നതോ
മുലചുരത്താത്ത നെഞ്ഞിടം സ്നിഗ്ദ്ധമായ് -
ക്കുതിരുവാനമ്മ നീരിറക്കുന്നതോ?
വിതകള് മണ്ണിലേക്കാണ്ടുപോയ്, വ്യര്ത്ഥമായ്
കതിരു പൊട്ടാതടിഞ്ഞൂ തുടിപ്പുകള്
ഉഴുതു നീക്കാത്ത കാലപ്പകര്ച്ചകള്
ഒഴുകിനീങ്ങി നീര്ച്ചാലുകള് തീര്ക്കുമോ?
മഴ കിതക്കുന്നു! സപ്തതന്തുക്കളില്
ഇഴകള് ചുറ്റിപ്പിണഞ്ഞും, പൊടുന്നനെ
കടലുപോലെയിരമ്പിയും കൈകളാല്
നെടിയവൃക്ഷത്തലപ്പില്ച്ചുഴറ്റിയും
ചപലമേതോ വികാരത്തിനന്ത്യമോ,
പകലിരുണ്ടിതാ പെയ്യുന്നു ചുറ്റിലും!
Subscribe to:
Post Comments (Atom)
3 comments:
മനോഹരമായ കവിത ..കവിതയില് പഴമ തുടിച്ചു നില്ക്കുന്നു
"പ്രളയകാലം പുനര്ജ്ജനിക്കുന്നതോ,
വ്രണിതക്ഷിത്തിന്നടങ്ങാത്ത രോഷമോ,"
ഇവിടെ വായിക്കാൻ കിട്ടുന്ന കവിതകളെല്ലാം വളരെ നല്ലത് ആണു.
ആശംസകൾ.
നന്ദി രമേശ് അരൂര്, കലാവല്ലഭന് വായിച്ചു അഭിപ്രായംന് കുറിച്ചതിനു്
Post a Comment