ശിഥില ബിംബങ്ങള്‍

മിഴിയഴകില്‍ച്ചിരിതൂകും പുലരി-

ക്കതിരാലെന്നുടെ മുറ്റത്തും,

ഒഴുകിനടക്കും നീരദ ശകല-

പ്പുഴകള്‍ നീലാകാശത്തും.

ഝിലഝിലമൊഴുകും നിര്‍ഝരി നിരതം

പുളകമുണര്‍ത്തിയുണര്‍ന്നേറ്റു

അഴകാര്‍ന്നൊഴുകാന്‍ ചികുരഭരക്കെട്ട-

ഴകില്‍ ചിക്കിമിനുക്കുന്നൂ.

ഗിരിനിരകള്‍,ത്തരുശിഖരമുഖങ്ങള്‍

കലപില കൂട്ടും പക്ഷികളും

കൊടിയതപം കൊണ്ടുഴറി വനങ്ങള്‍-

ക്കകമേ പൂക്ക മൃഗാവലിയും

ചിനു ചിനെ ചിതറി പ്പെയ്തു നിറയ്ക്കും

മുകിലിനെ നോക്കിയെഴുന്നേറ്റൂ,

പുതുമഴയുലകില്‍ രാപ്പകല്‍ നിറെയെ-

ക്കയറിയിറങ്ങി പെയ്യട്ടെ!

ചെറുകറുകപ്പുല്‍ക്കൊടികള്‍ തെരുതെരെ

പുതുനാമ്പിന്‍ കൊടി നാട്ടുന്നു

ചുടുമണിലില്‍ച്ചെറു കണികക്കുള്ളി-

ലുറങ്ങിയ വിത്തു മുളയ്ക്കുന്നു.

ഇതു പുളകം, പല ഋതുഭേദങ്ങള്‍

പുതുക്കും പലപല ചിത്രങ്ങള്‍

പ്രകൃതിയൊരുക്കിയ സമയരഥം പാ-

ഞ്ഞകലേ, വീഴ്ത്തിയ ബിംബങ്ങള്‍.

അകലുകയോ നാം? ചപലം ധരയുടെ

മുലയും മൂക്കുമരിഞ്ഞിന്നോ,

നെടിയ മഹാ മണിസൌധക്കാ‍ടുകള്‍

നിറയെയുയര്‍ത്തിപ്പണിയുന്നു.

ഇതു കോണ്‍ക്രീറ്റാണറിയുക, ഭൂവിന്‍

മടിയിലൊതുങ്ങാ,ത്തമിത ഭരം

ഒടുവില്‍ മടുത്തു പ്രകമ്പന കമ്പന-

മറിയാതമ്മയണച്ചീടും