അംഗുലപ്പുഴു

അംഗുലപ്പുഴു
(അവലംബം: ശ്രീനാരായണഗുരു ഹിന്ദുവോ? - ശ്രീ എം കെ പവിത്രന്‍)


കൂരിരുള്‍പ്പരപ്പിലെ-
     ക്കൊള്ളിമീന്‍ പോലെ പാരി-
ലാരെയും ഭ്രമിപ്പിക്കും
     വെള്ളിനൂല്‍ത്തിളക്കമായ്
പാറിടും പക്ഷിക്കുണ്ടു
      വിസ്മയിപ്പിക്കും ശോഭ-
യേറിടും ചിറകുകള്‍,
      പാടുവാന്‍ ലയം, സ്വരം.
കണ്ണിലായ്ക്കാരുണ്യത്തിന്‍
      വെണ്‍പ്രഭാഞ്ചിതം രശ്മി-
യെങ്ങുമേ സ്ഫുരിപ്പിക്കു-
      മാര്‍ദ്രമാം കടാക്ഷവും.
വന്നുപോം ദേശാടന-
     പ്പക്ഷികള്‍ യഥാകാല,-
മൊന്നതില്‍ ചിരംജ്ജിവി-
     യീവിധം വിരാജിപ്പോന്‍.

മണ്ണിലെപ്പുഴുക്കളില്‍
     മുമ്പനാ,യൊരംഗുലം
പോന്നവന്‍, സ്വയം മൊഴി"ഞ്ഞം-
     ഗുലപ്പുഴു; ഞാനോ
ആരെയും അളക്കുവാന്‍
    നീളമുള്ളവന്‍, നിന്നെ
നേരെ ഞാനളന്നിടാം
    എത്ര നിന്‍ വലിപ്പമോ?"

പക്ഷിയെപ്പലേവിധ,മം-
     ഗുലാകാരന്‍ ചുറ്റി-
ത്തീഷ്ണമായളന്നു തന്‍
    ഭാഷ്യവും ചമച്ചിട്ടു;
ഒക്കെ ഞാനളന്നതിന്‍
    പക്ഷവും നിരൂപിച്ചു
തിട്ടമായ്, ശരിക്കവന്‍
     അംഗുലീപരിമിതന്‍ !

ശുഭ്രമാ,യകക്കാമ്പിന്‍
     സൗന്ദര്യം സ്വരൂപിച്ചി-
ട്ടപ്രമേയമാം കണ്ണി-
     ലൊക്കെയും നിറച്ചു, തന്‍
സ്വച്ഛസുന്ദരം സ്വരം 
     കൊക്കിലേക്കാവാഹിച്ചു
വാച്ച കൗതുകാല്‍ ഖഗം
    ഗാനമൊന്നുതിര്‍ത്തു; "ഹേ!
അംഗുലപ്പുഴൂ, നിന്നാലെ-
    ങ്ങനെയളക്കുവാന്‍,
നിന്‍ കണക്കുമായെന്റെ
    ഗാനവും സ്വരങ്ങളും?"