Sunday, May 17, 2015

നിലാത്തെളി.

നിലാത്തെളി.

എല്ലാ കവികളും സിനിമയ്ക്കുവേണ്ടി പാട്ടെഴുതുമ്പോൾ നൃത്തത്തിനു പാട്ടെഴുതുവാനാണു എനിക്കവസരം കിട്ടിയത് .അതിന്റെ അവതരണം കാണാൻ ഇന്നു പോയിരുന്നു, ചേരനല്ലൂർ കാർത്ത്യായനി ക്ഷേത്രത്തിൽ. സരള ടീച്ചർ സംവിധാനം ചെയ്തവരിപ്പിച്ച “ലാസ്യ പ്രപഞ്ചം“ എന്ന നൃത്ത രൂപം. ജ്യോതിർഗോളങ്ങൾ, പ്രകൃതി, വായു, അഗ്നി,ആകാശം, തിര്യക്കുകൾ, അവയുടെ സഹജീവനം ഇവ നൃത്ത രൂപത്തിൽ വരച്ചുകാട്ടികൊണ്ട് സദസ്സിനെ കയ്യിലെടുത്തു ഈ ആവിഷ്കാരം. 43 കുട്ടികൾ പങ്കെടുത്ത ഈ അവതരണത്തിൽ ചന്ദ്രനെയായിരുന്നു ഞാനെഴുതിയ “നിലാത്തെളി“ എന്ന കവിത ആലപിച്ചവതരിപ്പിച്ചത്. ശ്രീ ബൈജു ആയിരുന്നു സംഗീതം നൽകി ഈ കവിത ആലപിച്ചത്. കാണുക.

ഈറനുടുത്തൊരു കാർമുകിൽ വൃന്ദം
ആരെ മറച്ചു പിടിക്കുന്നോ?
കരിമുകിൽമാലയെടുത്തിട്ടാരുടെ
മാരനു സ്വാഗതമോതുന്നോ?
കുതുകമിയന്നു വിയത്തിൽ ചെറു ചെറു
മിന്നാമ്മിന്നികൾ നിൽക്കുമ്പോൽ
ഉഡുഗണമഖിലം രാവിൻ മുടിയിൽ
മുത്തണിമാലകൾ ചൂടുന്നോ?



ആരുടെ വരവോ? തിങ്കൾക്കലയൊരു
പോരിനു തേരൊലി കൂട്ടുന്നോ?
വാൾമുനപോലൊളി മിന്നും തിരുവുടൽ
ചെറ്റു മറച്ചു ചിരിക്കുന്നു.

ഇന്ദുമുഖാംബുജ സുന്ദര രൂപം
മന്ദമണഞ്ഞതു കണ്ടപ്പോൾ
ചന്ദനലേപം പൂശിയ വാർമുകി-
ലംഗന ലജ്ജയണിഞ്ഞെന്നോ?

video
 പനിമതി രാവിലുദിക്കും, ധരയിലെ
ജനിമൃതികൾക്കൊരു കാവലുമായ്
നിയതമിതേമട്ടുലകം ചുറ്റി
സമയരഥത്തിലിറങ്ങുമ്പോൾ
അകലെദ്ദിനകര കിരണമുഖങ്ങൾ
അരുണിമചാർത്തിമറയ്ക്കുന്നൂ
പഴയകളങ്കം, കാളിമ, കറകൾ
മറയും ദീപ്തി ചുരത്തുന്നു,
പുതിയ നിലാത്തെളിയൊളിയൊഴുകുന്നൂ
പുതിയ ഋതുക്കൾ തെളിക്കുന്നൂ.

7 comments:

Cv Thankappan said...

വിഡിയോ കിട്ടുന്നില്ലല്ലോ?
ആശംസകള്‍

ശ്രീജ പ്രശാന്ത് said...

വീഡിയോ ഇതീൽ കിട്ടുന്നില്ല..ഫേസ് ബുക്കിൽ കണ്ടിരുന്നു..ആശംസകൾ

Girija Navaneethakrishnan said...

വരികൾ നന്നായിരിക്കുന്നു. പക്ഷേ കേൾക്കുവാൻ പറ്റുന്നില്ലല്ലോ. Wish you all the best.

ഷാജി നായരമ്പലം said...

ശരിയാക്കിയിട്ടുണ്ട് വീഡിയോ. നന്ദി വായനക്ക്

ajith said...

വായിച്ചു
കണ്ടു
കേട്ടു

വളരെ മനോഹരമായിരിക്കുന്നു. കുട്ടികളുടെ നൃത്തവും നന്നായിട്ടുണ്ട്. നല്ല കവികള്‍ക്കേ നല്ല ഗാനങ്ങളും എഴുതാന്‍ സാധിക്കുകയുള്ളു. ഇനി സിനിമകളിലും താങ്കളുടെ ഗാനങ്ങള്‍ കേള്‍ക്കാനിടവരട്ടെ എന്ന് ആശംസകള്‍

Girija Navaneethakrishnan said...

ഇപ്പോൾ കേട്ടു. നല്ല വരികൾ, നല്ല സംഗീതം, നല്ല ആലാപനവും. സംഗീതവും ആലാപനവും ആരാണ്? നൃത്തവും നന്നായിട്ടുണ്ട്.

ഷാജി നായരമ്പലം said...

നന്ദി കുറിപ്പുകൾക്ക്.....ശ്രീ ബൈജു ആണു സംഗീതവും ആലാപനവും നിർവഹിച്ചത് ടീച്ചർ. അദ്ദേഹം ഒരു സോപാനഗായകൻ കൂടിയാണു്